Il-GWU: Il-ħaddiema għandhom ikunu fil-qalba tal-istrateġija ekonomika u industrijali Ewropea

16 Sep 2026 - Aħbarijiet | AI News | Dinja u Kronika | Ekonomija | Home | Is-Sezzjoni Internazzjonali | Politika | Teknoloġija

Reazzjoni tal-President tal-GWU Jason Deguara għad-diskors tal-President tal-Kummissjoni Ewropea Ursula von der Leyen “State of the Union”

Id-diskors tal-President tal-Kummissjoni Ewropea Ursula von der Leyen “State of the Union” sar f’mument kruċjali għall-Ewropa, li qiegħda tiffaċċja sfidi ekonomiċi, soċjali u ġeopolitiċi sinifikanti.

F’reazzjoni inizjali f’isem il-General Workers’ Union (GWU), il-President tal-GWU Jason Deguara saħaq li r-rispons tal-Ewropa għal dawn l-isfidi għandu jqiegħed lill-ħaddiema fil-qalba tal-istrateġija ekonomika u industrijali tagħha.

“Nilqgħu l-attenzjoni li ngħatat lill-impjiegi u lill-ħiliet. Madankollu, il-kompetittività u t-trasformazzjoni teknoloġika għandhom jimxu id f’id ma’ impjiegi ta’ kwalità, pagi ġusti, protezzjoni soċjali b’saħħitha u djalogu soċjali effettiv,” qal Deguara.

Huwa sostna li t-tranżizzjonijiet diġitali u ambjentali qegħdin ibiddlu b’mod sostanzjali d-dinja tax-xogħol. Għaldaqstant, dawn il-bidliet għandhom ikunu ġusti u inklussivi, filwaqt li jkunu sostnuti minn investiment xieraq fit-taħriġ, fit-titjib tal-ħiliet u fit-taħriġ mill-ġdid tal-ħaddiema.

“L-Ewropa ma tistax tkejjel is-suċċess tagħha biss permezz tat-tkabbir ekonomiku, il-kompetittività jew l-avvanz teknoloġiku. Ir-reżiljenza u l-prosperità Ewropea għandhom jissarrfu f’aktar sigurtà, dinjità u opportunitajiet għall-ħaddiema u l-familji tagħhom,” kompla jgħid il-President tal-GWU.

Deguara tenna wkoll l-importanza tad-djalogu soċjali u tal-parteċipazzjoni effettiva tat-trejdjunjins fit-tfassil u fl-implimentazzjoni tal-politiki Ewropej. Huwa qal li deċiżjonijiet li jolqtu direttament lill-ħaddiema għandhom jittieħdu bil-kontribut u bl-involviment tar-rappreżentanti tagħhom.

Il-GWU se tkompli taħdem favur Ewropa li tgħaqqad il-kompetittività mal-ġustizzja soċjali u tiżgura li l-progress ekonomiku u teknoloġiku jwassal għal xogħol deċenti, kundizzjonijiet aħjar u kwalità ta’ ħajja ogħla għal kulħadd.