Donazzjoni tad-Demm: Solidarjetà Bla Fruntieri

6 Nov 2026 - Aħbarijiet | Home

Persuni minn nazzjonalitajiet u kulturi differenti mistennija jingħaqdu flimkien fiċ-Ċentru Nazzjonali tat-Trasfużjoni tad-Demm f’Gwardamanġa nhar il-Ħadd li ġej fit-10.30am, f’inizjattiva li għandha l-għan li tiċċelebra s-solidarjetà, l-inklużjoni u l-importanza tad-donazzjoni tad-demm.

L-attività se tiffoka b’mod partikolari fuq ċittadini ta’ pajjiżi terzi (TCNs), filwaqt li tirrikonoxxi l-kontribut tagħhom lis-soċjetà Maltija u r-rieda tagħhom li jagħtu lura lill-komunità permezz tad-donazzjoni tad-demm.

L-organizzaturi jittamaw li din l-inizjattiva tħeġġeġ aktar persuni minn komunitajiet differenti biex jagħmlu l-pass u jsiru donaturi tad-demm. Fl-istess waqt, se tenfasizza kif ġest sempliċi ta’ ġenerożità jista’ jagħmel differenza kbira u jsalva l-ħajjiet.

L-attività se tkun ukoll opportunità biex jiġu rikonoxxuti dawk il-persuni li diġà għażlu li jagħtu d-demm tagħhom għall-ġid tal-oħrajn. F’dan il-kuntest, se jingħataw ċertifikati ta’ apprezzament lid-donaturi li ħadu sehem f’din l-inizjattiva.

Il-programm se jinkludi interventi minn rappreżentanti tal-awtoritajiet tas-saħħa, kif ukoll mis-Segretarju Ġenerali tal-General Workers’ Union (GWU), Kevin Camilleri.

Lil hinn mill-għarfien dwar il-ħtieġa kontinwa għad-donazzjonijiet tad-demm, din l-inizjattiva għandha l-għan li tenfasizza wkoll ir-rwol pożittiv li ċ-ċittadini ta’ pajjiżi terzi għandhom fis-soċjetà Maltija.

Billi tlaqqa’ flimkien persuni minn kulturi u sfondi differenti għal kawża komuni, l-attività tfittex li ssaħħaħ is-sens ta’ komunità u turi li kulħadd jista’ jagħti kontribut biex isalva l-ħajjiet, irrispettivament min-nazzjonalità jew mill-oriġini tiegħu.

Din l-inizjattiva sservi wkoll bħala tfakkira tal-importanza tad-donazzjoni tad-demm u tal-impatt sinifikanti li kull donatur individwali jista’ jkollu fuq il-ħajja ta’ pazjenti li jiddependu mit-trasfużjonijiet tad-demm.