Il-General Workers’ Union tilqa’ b’sodisfazzjon sentenza importanti tal-Qorti tal-Ġustizzja tal-Unjoni Ewropea tal-5 ta’ Marzu 2026 li tikkonferma li l-awtoritajiet pubbliċi jistgħu jinkludu kriterji soċjali, fosthom il-promozzjoni tan-negozjar kollettiv, meta jkunu qed jagħtu kuntratti pubbliċi.
Fis-sentenza tagħha, il-Qorti ċċarat li l-kundizzjonijiet tax-xogħol huma parti integrali mill-eżekuzzjoni ta’ kuntratt pubbliku u li l-awtoritajiet pubbliċi jistgħu jqisu dawn il-kriterji meta jiddeċiedu liema offerta hija l-aktar vantaġġjuża ekonomikament.
Dan ifisser li meta jinħarġu tenders pubbliċi, il-prezz ma jistax jibqa’ l-uniku fattur determinanti. Il-kwalità tal-impjiegi, ir-rispett lejn il-ħaddiema u l-eżistenza ta’ ftehim kollettiv jistgħu jkunu wkoll elementi importanti fil-proċess tal-għoti tal-kuntratti.
Fl-Unjoni Ewropea, l-akkwist pubbliku jammonta għal madwar €2 triljun fis-sena, u għalhekk is-sentenza tiftaħ il-bieb biex dawn ir-riżorsi jintużaw ukoll biex jitjiebu l-istandards tax-xogħol u l-kundizzjonijiet tal-ħaddiema.
Il-General Workers’ Union tqis din id-deċiżjoni bħala pass importanti lejn sistema ta’ xiri pubbliku li tqis mhux biss il-prezz iżda wkoll il-kwalità tal-impjiegi u s-sostenibbiltà soċjali.
Is-Segretarju Ġenerali tal-GWU Josef Bugeja qal, “Din is-sentenza hija konferma ċara li l-flus pubbliċi għandhom jintużaw mhux biss biex jinxtraw servizzi jew xogħlijiet, iżda wkoll biex jitjiebu l-istandards tax-xogħol. Il-Qorti tal-Ġustizzja qed tagħmilha ċara li l-awtoritajiet pubbliċi jistgħu jagħtu prijorità lil kumpaniji li jirrispettaw in-negozjar kollettiv u li joffru kundizzjonijiet tax-xogħol aħjar. Dan huwa pass importanti lejn ekonomija aktar ġusta u sostenibbli.”
Il-GWU temmen li Malta għandha tieħu din l-opportunità biex issaħħaħ l-użu ta’ kriterji soċjali fil-kuntratti pubbliċi sabiex il-flus tal-poplu jservu wkoll biex jinħolqu impjiegi ta’ kwalità u kundizzjonijiet tax-xogħol diċenti.
