VALLETTA, MALTA, 30 ta’ Awwissu 2025: Wara l-aħbar tal-bieraħ dwar l-għeluq f’fażijiet tal-impjant ta’ Carlo Gavazzi f’Bulebel, il-General Workers’ Union (GWU) immobilizzat pjan ta’ azzjoni immedjat biex tagħti l-appoġġ kollu lill-impjegati milquta.
Il-union diġà bdiet diskussjonijiet ma’ diversi entitajiet tal-Gvern, inkluż il-Ministeru għall-Ekonomija u l-Malta Enterprise, biex tifformula strateġija b’saħħitha għat-tranżizzjoni u l-integrazzjoni tal-ħaddiema f’impjiegi ġodda. Fl-istess ħin, minn mindu ħarġet l-aħbar tal-għeluq, diversi kumpaniji privati diġà avviċinaw lill-GWU bi proposti ta’ impjieg għal dawn il-ħaddiema ta’ ħila u sengħa.
“L-interess immedjat minn kumpaniji oħra huwa xhieda ċara li l-ħaddiema ta’ Carlo Gavazzi għandhom ħiliet apprezzati u mfittxija ħafna fis-suq tax-xogħol Malti,” qal is-Segretarju Ġenerali tal-GWU, Josef Bugeja. “Qed naħdmu b’mod attiv biex niżguraw li kull ħaddiem jinstablu rwol alternattiv jew opportunità ġdida li tirrispetta d-dinjità u l-esperjenza tiegħu.”
David Darmanin, Segretarju tat-Taqsima Teknoloġija, Elettronika u Komunikazzjoni, żied jgħid: “Immedjatament wara l-laqgħa mal-kumpanija, il-prijorità tagħna kienet li niltaqgħu mar-rappreżentanti tal-ħaddiema. Qed nibnu proċess ċar, pass pass, biex nappoġġjaw lil kull impjegat milqut u niżguraw li leħinhom jibqa’ ċentrali f’din il-konsultazzjoni.”
Il-GWU se tkompli tpoġġi lill-ħaddiema fil-qalba tal-proċess, filwaqt li taħdem bla heda biex tlaqqagħhom ma’ impjiegi ġodda u, fejn ikun meħtieġ, ma’ programmi ta’ taħriġ.
